ვალდებულება: ქალაქ ბათუმში საბიუჯეტო პროცესებში მოქალაქეთა ჩართულობის გაუმჯობესება მონაწილეობითი ბიუჯეტირების ინსტიტუციონალური მექანიზმის დანერგვის გზით
ვალდებულების აღწერა: ადგილობრივი თვითმმართველობის რეფორმის ახალი ტალღის მნიშვნელოვან ნაწილს ადგილობრივ დონეზე გადაწყვეტილების მიღების პროცესში მოქალაქეთა ჩართულობის ახალი მექანიზმების დანერგვა და რეალური შესაძლებლობების შექმნა წარმოადგენს. ამ მხრივ, ბევრ მუნიციპალიტეტში მნიშვნელოვანი გამოწვევაა მონაწილეობითი ბიუჯეტირებისთვის საჭირო ინსტიტუციონალური მექანიზმის არარსებობა და საბიუჯეტო პროცესებში მოქალაქეთა მონაწილეობის დაბალი მოტივაცია, რაც მნიშვნელოვნად მოქმედებს ჩართულობის ხარისხზე.

ღია მმართველობა საქართველოს 2018-2019 წლების ეროვნული სამოქმედო გეგმის ფარგლებში, ქ. ბათუმის მუნიციპალიტეტის მერიამ მონაწილეობითი ბიუჯეტირების ინსტიტუციური მექანიზმების დანერგვის გზით საბიუჯეტო პროცესებში საზოგადოების მონაწილეობის ჩართულობის გაუმჯობესება დაისახა მიზნად. გარდა ამისა, მოქალაქეთა სტრუქტურირებული მონაწილეობის უზრუნველყოფის მიზნით, დაიგეგმა ქალაქის ადმინისტრაციული ერთეულების მიხედვით საუბნო კავშირების ჩამოყალიბება და მოსახლეობის ცნობიერების ამაღლების კამპანია. ამასთან, მონაწილეობითი ბიუჯეტირების ინსტიტუციური მექანიზმის დანერგვის მიზნით, შესაბამისი სამართლებრივი ჩარჩოს დამტკიცება. შედეგი: ქალაქის ადმინისტრაციული ერთეულების მიხედვით შექმნილია საუბნო კავშირები; მონაწილეობითი ბიუჯეტირების შესახებ შესაბამისი საკანონმდებლო ჩარჩო დამტკიცებულია; მონაწილეობითი ბიუჯეტირების სისტემა დანერგილია; 2019 წლის ბიუჯეტში გათვალისწინებულია თანხები მონაწილეობითი ბიუჯეტირების პროცესის დროს გამოვლენილი პროექტის/პროექტების განსახორციელებლად
ვადა: დაწყების თარიღი - იანვარი 2018, დასრულების თარიღი - მარტი 2019
OGP მიმართულებები: გამჭვირვალობა, ანგარიშვალდებულება, ჩართულობა
საანგარიშო პერიოდი: 2019, წლიური
პასუხისმგებელი უწყება: ბათუმის მუნიციპალიტეტის მერია
USAID/GGI-ის მხარდაჭერით, 2019 წელს ქ. ბათუმის მუნიციპალიტეტის მერიამ შექმნა ელექტრონული პლატფორმა idea.batumi.ge, რომელიც მონაწილეობითი ბიუჯეტირების ერთერთ მექანიზმს წარმოადგენს და მოქალაქეებს პროექტების წარდგენის შესაძლებლობას აძლევს. ვებგვერდისა და რეგულაციების შესახებ ბრძანების პროექტი შეთანხმდა სამოქალაქო მრჩეველთა საბჭოსთან. გამოიცა მერის ბრძანება, რომელიც მონაწილეობითი ბიუჯეტირების განხორციელების წესს არეგულირებს.

ვალდებულებით გათვალისწინებული განხორციელების ეტაპების შესაბამისად, ჩამოყალიბდა და ამოქმედა 14 საუბნო კავშირი, რომელთა თავმჯდომარეები და მმართველი საბჭოს წევრები ტენდერში გამარჯვებული არასამთავრობო ორგანიზაციის ა(ა)იპ სამოქალაქო საზოგადოების ინსტიტუტის მიერ გადამზადდნენ. ორგანიზაციამ შეხვედრები გაიმართა ,,შენი იდეა ბათუმის მერს" პროექტით დაინტერესებულ პირებთან, მათ შორის, ეთნიკური უმცირესობების წარმომადგენლებთან. მოქალაქეების მიერ წარდგენილი 35 პროექტიდან ქ. ბათუმის მრჩეველთა საბჭოს მიერ შეირჩა 10 საუკეთესო. საბოლოოდ, 2 ათასზე მეტმა ბათუმის მოქალაქემ ხმის მიცემით გამოავლინა 3 გამარჯვებული. მუნიციპალიტეტის 2019 წლის ბიუჯეტში მონაწილეობითი ბიუჯეტირების პროცესის დროს გამოვლენილი პროექტების განსახორციელებლად გათვალისწინებულია 120 ათასი ლარი. ამჟამად მიმდინარეობს პროექტების განხორციელების სამუშაოები.

რაც შეეხება საინფორმაციო კამპანიას, დაიგეგმა და განხორციელდა რიგი აქტივობები: მომზადდა საინფორმაციო ბროშურები და პოსტერები, სოციალურგვერდებზე (Facebook-სა და Instagram-ზე) შეიქმნა სპეციალური გვერდები, მომზადდა 8 სატელევიზიო და 2 რადიო გადაცემა, გამოქვეყნდა 5 სტატია, ასევე, პროექტის განხორციელების ეტაპების შესახებ დამზადდა ვიდეორგოლი. მოქალაქეებთან გაიგზავნა მოკლე ტექსტური შეტყობინებები.

სამდივნოს შეფასებით, ვალდებულება გეგმით გათვალისწინებულ ვადებში სრულად შესრულდა, რადგან განხორციელებულია სამოქმედო გეგმით გათვალისწინებული ყველა ეტაპი.